Act 8 | MED | STEP | Stipen rok kondrung uⱡ ei, Sol ndi, kapⱡa nimba pitim. Ui ei kᵾn, Jerusalem kona ila Got nga rapa tenda wamp mbᵾ kᵾn, uⱡ mbun mindil pi mat, ekit urum. Nuim ei, mondᵾk pᵾtᵾng wamp nimbᵾ, nung nᵾk, kona elpa elpa Juriya kun, Sameriya kᵾn, titim kona nimbila purung. Jisas nga nombuⱡa rᵾng wu ni kᵾⱡ mint, Jerusa-lem kona ila int morung.

Acts 8

Sol Ndi, Got Nga Rapa Tenda Wamp Mbᵾ Etpa Kit Mundrum.

1 Stipen rok kondrung uⱡ ei, Sol ndi, kapⱡa nimba pitim. Ui ei kᵾn, Jerusalem kona ila Got nga rapa tenda wamp mbᵾ kᵾn, uⱡ mbun mindil pi mat, ekit urum. Nuim ei, mondᵾk pᵾtᵾng wamp nimbᵾ, nung nᵾk, kona elpa elpa Juriya kun, Sameriya kᵾn, titim kona nimbila purung. Jisas nga nombuⱡa rᵾng wu ni kᵾⱡ mint, Jerusa-lem kona ila int morung. 2 Got tᵾk ou ndurmᵾn wamp mat ndi, Stipen kurum ei nga koⱡa manga molk, wote on ni, mek puk angᵾndᵾtᵾng.

3 Ni kᵾn, Sol ni, wu ei ndi, Got nga rapa tenda wamp mbᵾ, ropa etpa kit mundimp nimba, manga elpa elpa mbila mba, mondpa pili wu amp mbᵾ pora, imp moⱡpa, tᵾpa pena ndupa, kan manga ila mundrum.

Pilip Ni, Sameriya Kona Ila Murum

4 Mondpa pili wamp nimbᵾ, nung nᵾk kona mbila elpa elpa purung. Puk kᵾn, Got nga Rᵾnang Ik kai ei, nᵾk mek ekit purung. 5 Wote, Pilip ni, wu ei ndi, Sameriya orunga mba kona peng tila, Jisas nga Rᵾnang Ik Kai ei, wamp mbᵾ pileing nimba mbo rundrum. 6 Kona ila wamp minal ndi, Pilip nga uⱡ rᵾpndi, Nuim ei nga ronduⱡ ila itim kandᵾk, ik nitim nimbᵾ pilik, kum tek kai mondᵾk morung. 7 Wote, Pilip ndi nilinga, wamp mat, kur kit rukᵾr murum nimbᵾ, ke nᵾk wamp nimbᵾ, wak rok ok, ekit purung. Omba ui ei kᵾn ku, wamp elkᵾna rambuⱡpa, etpa kit murum nimbᵾ nilinga, omba kun purum. 8 Uⱡ ei elinga kᵾn, kona peng ila nga wamp mbᵾ ndi, numan mam ti ngorung.

Kum Kundrum Wu Saimon

9 Sameriya kona peng ila ku, wu ti murum ei, mbi tek, Saimon nᵾtᵾng. Wu ei ndi, kum kundrum uⱡ mbᵾ ndi, wamp mbᵾ kandᵾk min ngᵾn mundᵾk elingina, elim wu nuim ti mor, nitim. 10 Wote, kona ila wamp ou kel, nuim kurpa nimbᵾ ndi, wu Saimon nga uⱡ itim mbᵾ kandᵾk pilik, tᵾk nᵾk mel, “Wu ei, Got nga ronduⱡ ti mbi tek, ‘Ronduⱡ Ou Ti,’ nᵾtmᵾn ni tepa morum,” nᵾtᵾng. 11 Saimon nga kum kundrum uⱡ elpa elpa mbᵾ elinga, ui ruⱡ etpa omba purum. Uⱡ mbᵾ, wamp mbᵾ ndi kandᵾk, min ngᵾn mondᵾk, ik kum tek morung. 12 Wote, wu Pilip ndi, Got nga wamp tᵾpa mumuk rui uⱡ ei kᵾn, wote Jisas nga mbi ei kᵾn, Rᵾnang Ik Kai ei, kundpa nitim ni kᵾn, wu amp raⱡ ik ei pilik tᵾk, wote nu tᵾtᵾng. 13 Wote Saimon elim, Pilip nga ik nitim nimbᵾ pilpa tᵾpa, Got kᵾn mondpa pitim. Wote nu tᵾpa kᵾn, Pilip kᵾn moⱡpa, uⱡ rᵾpndi mat, Nuim ei nga ronduⱡ ila, itim nimbᵾ kandpa, min ngᵾn mundrum.

14 Jisas nga nombuⱡa rung wu nimbᵾ ndi, Jerusalem kona ila molk pᵾtᵾng mel, Sameriya wamp nimbᵾ, Got nga ik ei, pilik tᵾng nᵾtᵾng. Ni kᵾn, Pita kᵾn Jon raⱡ kona ila nga pᵾl nᵾk tᵾk mundrung. 15 Wote, wu raⱡ ndi, Sameriya kona ila pukᵾⱡ kᵾn, mondpa pili wamp nimbᵾ, Muⱡnga Wingti ei, teing nᵾkᵾⱡ, Nuim ei kᵾn, atinga rorᵾnggil. 16 I etᵾnggil, ei nambuⱡ emel, wamp mbᵾ, Jisas nga mbi ila mint, nu tᵾk kᵾn, wote Muⱡnga Wingti ti natᵾtᵾng. 17 Wote ni kᵾn, Pita kᵾn Jon raⱡ ndi, mondpa pili wamp mbᵾ nga peng ila ambuⱡunggila, Muⱡnga Wingti oⱡnga tᵾtᵾng.

18 Saimon ndi, moⱡpa kᵾndrᵾm mel, mondpa pili wamp nimbᵾ nga peng ila ambuⱡunggila, Muⱡnga Wingti tᵾtᵾng uⱡ ni kandpa, Pita kᵾn Jon raⱡ nga ronduⱡ ei, elim ngᵾnggil nimba, ku moni mat nguimp nimba pilpa, waldpa nimba mel, “Enmbil uⱡ mbᵾ nga ronduⱡ ei, na nganggila kᵾn, wote na ndi, i ku etᵾp, wamp mat nga peng mbila ᵾmbuⱡamba, Muⱡnga Wingti teing ku,” nitim. 20 Wote Pita ndi, Saimon kᵾn, ik punt ropa, nimba mel, “Nim kᵾn nim nga ku moni ei kᵾn, ndip kona ila pinggil. Nambuⱡ emel, nim pᵾn ei, Got nga memp kai ei, nim nga ku moni ei ndi, kapⱡa rop rui nᵾrᵾn mon! 21 Tᵾn Got nga kongun enmin ila, nim ruk ila muⱡᵾn mel kapⱡa mon. Ei nambuⱡ emel, nim nga mundmong rukᵾr orunga, Got nga numan pᵾtᵾm ei mel pi napᵾtᵾm mon. 22 Ei nga, nim numan ropul rokᵾn, uⱡ kit ei, wak rokᵾn, Nuim ei kᵾn, atinga rana, nim nga numan kit pᵾn ei, wak rondᵾmba. 23 Ei nambuⱡ emel, na ndi, nim kant ei, nim nga numan ei, kng yuwi na ni mel, uⱡ kit mbᵾ ndi, ambuⱡpa kum ropa petᵾm ei ka!” nitim. 24 Wote Saimon ndi, Pita kᵾn, Jon raⱡ kundpa, nimba mel, “Wu raⱡ ye! Na nga nᵾkᵾⱡ, Nuim ei kᵾn atinga ranggila, Nuim ei ndi, na kont kuⱡpa, na nga uⱡ ninimbil mbᵾ, na kᵾn pi nᵾpangga,” nitim. 25 Pita kᵾn Jon raⱡ ndi, Nuim ei nga ik puⱡ mbᵾ, wamp mbᵾ kᵾn nᵾkᵾⱡ pendkᵾⱡ, wote Jerusalem kona ila, int purᵾnggil. Pukᵾⱡ kᵾn, Sameriya kona kel kel tᵾtᵾm mbila, wamp ou ndupa, Nuim ei nga Rᵾnang Ik Kai mbᵾ, nᵾkᵾⱡ ngorunggil.

Pilip Kᵾn Itiyopiya Kona Ila Wu Ti Kᵾn

26 Ni kᵾn, Nuim nga anggelo ti ndi, Pilip kundpa, nimba mel, “ Nim tᵾkᵾn kona etkᵾn pukᵾn, nombuⱡa mam ti, Jerusalem kona ou ila tepa mba, Gasa kona purum ila pi!” nitim. 27 Ei kᵾn, Pilip tᵾpa kun etpa mba, nombuⱡa ila, Itiyopiya kona wu ti kandrum. Wu ei, wu oⱡa orunga ei, Itiyopiya kona amp Kuin ei nga ku moni rᵾp inditim. Wu ei, Jerusalem kona ou ila mba, Got nga mbi paka rondpa pendpa, wote mang kona mbi nimba, elim nga kar mel kng os ndi, kondpa tᵾtᵾm mel ila urum. Ni kᵾn, elim oⱡa moⱡpa, pai nui wu Aiseiya nga mon rurum ik ni, kᵾmp ropa purum. 29 Wote ila nga, Muⱡnga Wingti ndi, Pilip kundpa, nimba mel, “Nim kar mel punum mel kᵾⱡ ila, nondpa pi,” nitim. 30 Pilip nondpa mba, kum tᵾpa pim mel, wu ni, painui wu Aiseiya nga mon rurum ik ni, kᵾmp ropa purum. Pilip ndi, wu ni waldpa, nimba mel, “Nim ik mong kᵾmp ron kᵾⱡ, pilkᵾn kun en ei?” nitim. 31 Wu ei ndi, nimba mel, “Na pilip kun itimp mel nant? Wamp ti ndi, na ik puⱡ kᵾⱡ, ropul ropa nimba ngum ndam, pilimp ei ka!” nitim. Wote, Pilip wu ni ndi, oⱡa tᵾpa mepa purum. 32 Ik mong, Itiyopiya wu ei, kᵾmp rurum ei mel,

“Wu ei kng sipsip na ti, rok kunding pilik mek purmun ni mel kapⱡa. Wote, kng sipsip waⱡ na ti, elim nga ndi mbᵾ, purⱡina rowa ndupa, uⱡ ti iti natᵾpa, raka nimba morum. Ei mel ku, wu ei ik ti ni nᵾndᵾtᵾm. Elim tᵾk mana nduk, kot itim ik mbᵾ, kapⱡa mon nᵾtᵾng. Wamp ti ndi, kapⱡa wu ei nga wamp rᵾⱡaip mbᵾ, pilik mbi ndui nᵾnding. Ei nambuⱡ emel, wu ei nga mᵾi kona ila moⱡpa, urum ui ei pora nitim,” nitim.
34 Wote, ku moni rup etᵾm wu ni ndi, wu Pilip waldpa, nimba mel, “Painui wu ei ndi, nam kundpa nᵾnᵾm? Elim nga, muna wamp elpa ti nga pilpa nitim nda? Na kundkᵾn nin ka!” nitim. 35 Wu Pilip ik puⱡ mondpa nitim ei, wu ni nga ik mong kᵾmp rurum nila nimba mba, wote Jisas nga rᵾnang ik kai mbᵾ kundpa nitim. 36 Ei mel nᵾkᵾⱡ, nombuⱡa mam ila okᵾⱡ, wote nu ti omp purum nila ruk oⱡunggila, wu ni ndi, Pilip waldpa, nimba mel, “Ya ei nu ei ka! Namba mel ti ndi, na imp moⱡangga, nu ti nᵾtimp nda?” nitim. [ 37 Wu Pilip ndi, wu ni i kundpa, nimba mel, “Nim nga numan orunga mondkᵾn pin ndam, kapⱡa nu tᵾn!” nitim. Wote elim ndi, punt ropa, nimba mel, “Na kupa pᵾnt, Jisas Kraist ei, Got nga kangᵾm ei,” nitim.] 38 Wote, Itiyopiya wu ni ndi, kar mel purᵾnggil mel, ni kᵾⱡ ambuⱡnga, wu raⱡ mana okᵾⱡ, nu ila mana pukᵾⱡ, Pilip ndi, wu ni, nu tinditim. 39 Wote, wu ni raⱡ, nu ila ekit oⱡunggila, Nuim ei nga Muⱡnga Wingti ei ndi, Pilip ni, kiyang nimba tᵾpa, mepa purum. Wu ni, Pilip kᵾni nakᵾndrᵾm ei nga, nimba pi nᵾpᵾtᵾm. Elim numan kai pilpa, mang kona purum. 40 Wu Pilip elim kandrum ei, elim ni, Asotas ni, kona ila murum mel itim. Kona ila moⱡpa, mbi nimba mba mel, nombuⱡa ruk ting kona peng kel kel titim mbila, Jisas nga Rᵾnang Ik Kai mbᵾ, wamp mbᵾ kᵾn, nimba ngumba mint mba, Sesariya ekit purum.